Gilas team sasalubungin (Gaya ng isang bayani)

DUMATING na ang Team Gilas Pilipinas sa Ninoy Aquino International Airport (NAIA) kahapon kasunod nang kanilang runner up finish sa prestihiyosong 2015 FIBA Asia Championships na ginanap sa Changsha, China.

Mainit na sinalubong ng Filipino fans ang mga player at coaching staff ng national basketball team ng bansa.

Isa-isa silang binigyan ng garland bilang pagbibigay-pugay sa kanilang pagsisikap.

Iniladlad din ang malaking streamers bilang pagsalubong sa team.

Para sa mga kababayan, itinuturing pa rin nilang bayani ang mga player dahil sa ipinakitang tapang at puso sa pakikipaghamok sa malalakas na team sa kabila na halos dalawang buwan lamang ang preparasyon.

Para sa fans, kung ikokompara ang Gilas, noong nakarang taon pa nagsimula sa kanilang preparasyon ang powerhouse China.

Ipinagtanggol din ng ibang die hard basketball fans ang Gilas dahil kung tutuusin walang pantapat sa apat na mga higante na ipinarada ng China.

Habang ipinagmalaki nang naturalized player na si Andray Blatche at iba pang kasama ang kanilang nakamit na silver medal.

Labis din ang pasasalamat ni national head coach Tab Baldwin sa Filipino fans.

Ayon sa kanya, walang salita na makapagbubuo ng kanilang todong pasasalamat sa mga dasal at suporta na ibinigay sa kanilang koponan.

Malaki aniya ang utang na loob nila sa fans na nagmamahal sa larong basketball.