9 patay, 3 sugatan sa bumaliktad na van (Driver nakaidlip)

KIDAPAWAN CITY – Siyam ang patay habang tatlo ang malubhang nasugatan sa bumaligtad na pampasaherong van dakong 2:45 a.m. kahapon sa probinsiya ng Cotabato.

Ayon kay Cotabato PNP provincial director, Senior Supt. Alexander Tagum, lulan ang mga biktima sa isang pampasaherong D4D van (LHM-995) mula sa Davao City patungong Kabacan, Cotabato ngunit pagsapit sa Brgy. West Patadon sa bayan ng Matalam, Cotabato, bigla itong nagpagiwang-giwang sa kalsada hanggang bumangga sa malaking punongkahoy.

Dahil sa lakas ng pagkabangga ng van, walo agad ang binawian ng buhay at isa ang dead on arrival sa Babols Hospital sa Matalam. Habang tatlo ang nasa maselang kondisyon.

Marami ang naniniwala na posibleng nakaidlip ang driver na naging dahilan ng insidente.

Patuloy ang imbestigasyon ng pulisya sa pagkakakilanlan ng mga biktima.