Pag-aresto kay Ecleo tiniyak ng CIDG

KABILANG sa pinagtutuunan ng pansin ng PNP-CIDG ay maaresto ang isa sa “big five” na si dating Dinagat Island Rep. Ruben Ecleo Jr.

Ayon kay PNP CIDG chief, Chief Supt. Victor Deona, may mga hakbang na silang ginagawa para maaresto si Ecleo ngunit tumangging sabihin kung ano na ang resulta ng kanilang pagtugis.

Siniguro ng heneral na gagawin nila ang lahat para makompleto sa kulungan ang “big five.”

Sinabi ni Deona, patuloy na nagsusumikap ang kanyang mga tauhan para matunton ang posibleng pinagtataguan ng wanted na mambabatas.

Pahayag pa niya, hindi pwedeng idaan sa takutan o bigyan ng ultimatum ang mga tauhan para matagpuan si Ecleo dahil dumidepende sa natatanggap na mga impormasyon ang kanilang misyon.

 Umaasa si Deona na sa pinakamabilis na panahon ay mayroon ding magkalakas loob na impormanteng makapagtuturo sa pinagtataguan ni Ecleo para ganap nang maaresto.

 Si Ecleo ay may patong na P2 milyon pabuya sa ulo tulad ng alok sa unang apat na nahuli sa “big five” na sina Globe Asiatique developer Delfin Lee; retired Gen. Jovito Palparan, dating Palawan Gov. Joel Reyes, at dating Coron Mayor Mario Reyes.

 Nahaharap sa kasong parricide si Ecleo dahil sa pagpatay sa kanyang asawa na si Alona Bacolod-Ecleo noong taon 2002.