Call center agent dedbol sa bundol ng truck

BINAWIAN ng buhay ang isang call center agent makaraang mabundol ng isang delivery truck sa kanto ng C-5 at Origas Avenue, Pasig City kahapon ng madaling araw.

Sa inisyal na imbestigasyon, kinilala ang biktimang si Alquier Maranan, empleyado ng Transcom, tumatawid sa lugar nang mahagip ng truck.

Aminado ang driver ng truck na si Danilo Gabitano, nakita niyang papatawid ang biktima, at sinubukan niyang iwasan.

Gayonman, dahil matulin ang takbo ng truck at nawalan ng preno ay nabundol ang biktima.

Napuruhan sa ulo ang biktima kaya agad nalagutan ng hininga.

Dinala rin sa ospital ang driver para ipa-medical exam, habang inihahanda na ang kasong reckless imprudence resulting in homicide na isasampa sa kanya.