Admin bigo — Marcos

TAHASANG binatikos ni Senador Ferdinand “Bongbong” Marcos ang administrasyong Aquino sa aniya’y pagkabigong tugunan ang mga problema ng bansa dahil puro pamomolitika ang ipinaiiral.

Partikular na tinukoy ni Marcos ang problema sa sektor ng agrikultura na nagkaroon nang kakulangan sa pagsuporta sa mga magsasaka naging dahilan upang umangkat na lamang ng bigas mula sa ibang bansa.

Ipinunto ni Marcos, sa kabila na tayo ang kauna-unahang bansa sa Asya na nagkaroon ng LRT, sa ngayon tayo ang bansang may pinakamalalang problema sa trapiko.

Aniya, malaki ang epekto ng matinding traffic jam sa ating ekonomiya at sa bawat mamamayan lalo na sa mga empleyado at mag-aaral.

Ayon kay Marcos, sa pagnanais na mapabilis ang transportasyon, pinili ng ating mga kababayan ang sumakay sa MRT ngunit hindi maganda ang serbisyo at umaabot sa dalawang oras ang kanilang pagpila pa lamang at siksikan at tulakan sa mismong pagsakay ng MRT.

Iginiit ni Marcos, imbes magpatupad ng mga programa para sa ating bansa at mamamayan, mas nais pang mamolitika ng kasalukuyanag adminitrasyon.

Dadag ni Marcos, puro pagsasampa ng kaso at pagtitiyak na mawawasak ang mga kalaban ng kanilang mamanukin sa 2016 election, ang ginagawa ng administrasiyon.

“Nakalulungkot dahil matiyak lamang ng kasalukuyang adminitrasyon na bumango at sumikat ng kanilang mamanukin ay wala na silang pakialam sa tunay na problema ng bawat mamamayan,” ani Marcos.