VP nanggugulo lang

SINAGOT ni Mar Roxas ang mga pasaring ni Vice President Jejomar Binay tungkol sa plano daw na dayain siya sa darating na eleksyon.

“Ano pang ine-expect natin sa mga taong di humaharap sa mga paratang sa kanya?” sabi ni Roxas nang makausap ito ng mga mamamahayag pagkatapos ng panunumpa ng mga opisyal ng Liga ng mga Barangay sa isang hotel sa Parañaque.

“Guluhin ang usapan, mag-aakusa ng kung anu-ano. Wala kaming history ng pandaraya,” diin ni Roxas.

Sinariwa ni Roxas ang naging sitwasyon noong huling nakalaban niya si Binay para sa puwesto ng bise presidente noong 2010, kung saan lumamang si Binay ng mahigit 700,000 na boto lamang. Maraming nagsa-sabing dahil ito sa pagdeklarang walang bisa ang dalawang milyong boto mula sa Regions 6 and 7 sa Visayas, ang kilalang balwarte ni Roxas, na kinikilalang anak ng Visayas.

“Ako po ang minsang nadaya, dalawang milyong null votes sa Visayas. Ako bilang biktima, ipaglalaban ko ang tapat at malinis na halalan,” pahayag ni Roxas nang hingan siya ng reaksyon sa naging pasaring ni Binay.

Ngayon lang nilitaw ni Binay ang mga sinasabing pangambang pandaraya, kung kelan nalampasan na siya ni Roxas sa pinakabagong Ulat ng Bayan ng Pulse Asia.

“Napakahalaga na maging maayos at matuwid ang susunod na halalan,” sabi ni Roxas.

Patuloy ang pag-angat ng mga rating ni Roxas sa mga lumalabas na survey pagkatapos iendorso ni  Pangulong Benigno “Noynoy” Aquino bilang kanyang manok sa Daang Matuwid sa darating na eleksiyon.