Babaeng sinapian ng bad spirit utas sa biyenan

BACOLOD CITY – Bumulagtang walang buhay sa gitna ng ulan sa labas ng kanilang bahay ang isang babae makaraang pagsasaksakin ng kanyang biyenan nang magwala ang biktimang sinasabing sinapian ng masamang espirito kamakalawa sa Sitio Canbanong, Brgy. Guiljungan, bayan ng Cauayan, sa Negros Occidental.

Ayon kay PO1 Errol Sebua, case investigator ng Cauayan Police Station, ang 22-anyos biktimang si Annabelle Fundales ay may 27 maliliit na saksak sa katawan at basag ang ulo.

Habang kinilala ang suspek na si Susimo Burdago, 68, biyenan ng biktima.

Base sa inisyal na imbestigasyon ng mga awtoridad, nagwala ang biktima dahil sinaniban ng masamang espirito at upang tumigil,pinagsasaksak siya ng kanyang biyenan at pinalo sa ulo gamit ang baton stick na naging sanhi ng kanyang kamatayan.

Samantala, ayon sa pamilya ng biktima, may karanasan na sila noon na sinasapian ng masamang espirito ang biktima at tila nababaliw.

Inako agad ng suspek ang krimen at nasa kustodiya na siya ngayon ng pulisya.