Serg inggit na inggit kay Chiz

TINAWAG ni Sen. Serg Osmeña na isang uri ng gimik ang sinabi ni Sen. Chiz Escudero na ang kanilang partido ni Sen. Grace Poe para 2016 presidential elections ay tatawaging  “Partido Pilipinas.”

Kung titingnan mong mabuti, may punto naman talaga si Osmena sa kanyang puna kay Chiz dahil wala naman talagang matatawag na “Partido Pilipinas” maliban sa LP, NP, UNA, PDP-Laban at iba pang political party na estabilisado at pormal na kinikilala ng Comelec.

Ang sinabi ni Escudero na “Partido Pilipinas” ay masasabing isang propaganda o slogan, at matatawag na isang pambo-bola sa taumbayan.  Walang saysay dahil sa hindi naman reshistrado sa Comelec ang “Partido Pilipinas.”

Pero ano naman kaya ang motibo ni Osmeña at bakit napakabilis nitong punahin si Escudero? Simple lang naman ang sagot… e, di inggit.  Sa kabila kasi ng  pagiging malapit ng dalawang senador kay Poe, mukhang nabaling nang husto ang pansin kay Escudero at nakalimutan na si Osmeña.

Hindi rin kaya ang pagkakahirang ni Escudero bilang bise presidente ni Poe ang dahilan kaya nagmamarakulyo si Osmeña?  Sa mga inaasal nitong si Osmeña, hindi lamang niya inilalagay sa kahihiyan kundi pinabababa pa niya ang kanyang sarili.  Nakatatakot ang inggit dahil marami na ang namatay diyan lalo na kapag biglang inatake sa puso.