Branch manager ng Koop naglason bago nagbigti

VIGAN CITY – Hindi na umabot nang buhay sa ospital ang isang branch manager ng kooperatiba na uminom ng insecticide bago nagbigti sa probinsiya ng Ilocos Sur kamakalawa.

Kinilala ang biktimang si Raymond Manzano, 30, residente ng Sitio Bariquir, Brgy. Balingaoan, Candon City, branch manager ng Sacret Heart Savings Cooperative na nakabase sa San Nicolas, Ilocos Norte.

Ayon kay Supt. Richmon Tadina, hepe ng Candon city police station, kukuha sana ng gagamiting pangposte sa ginagawang kubo para sa burol si Richard Maranion nang makitang nakabitin sa ilalim ng puno ng madre de cacao ang biktima gamit ang pump belt.

Narekober ng Scene of the Crime Operatives (SOCO) sa pinangyarihan ng krimen ang isang bote ng Brodan insecticide, na ginagamit sa pang-spray ng mga peste at oud sa mga pananim.

Bago ang pagpapatiwakal ni Manzano, nakita ni John Paul Gacusan ang biktima sa beranda ng bahay ng kanyang tiyuhin na hawak ang nasabing insecticide.

Patuloy ang imbestigasyon ng Candon city police station hinggi sa insidente.