Walang ebidensiya vs JPE — prosekusyon

AMINADO ang prosekusyon na wala silang direktang ebidensya laban kay Sen. Juan Ponce Enrile kaugnay sa pagtanggap ng kickback mula sa kontrobersiyal na multi-billion peso pork barrel scam.

Sa ginanap na oral summation para sa petition to post bail ni Janet Lim-Napoles sa Sandiganbayan Third Division, tinanong ni Associate Justice Samuel Martires ang prosecution panel kung pagkalipas ng isang taon ng pagdinig ay may patunay o ebidensya silang maipakikita na may natanggap na kickbacks si Enrile, sagot ni Prosecutor Edwin Gomez, sa ngayon ay wala pa para sa bail hearing.

Habang tinanong ni Presiding Justice Amparo Cabotaje-Tang, ang prosekusyon kung tama ba para sa korte na ibasura ang kaso laban kay Enrile kung walang patunay na tumanggap siya ng kickbacks, sagot ng prosekusyon ay “yes”.

Ngunit iginiit ni Gomez, kahit walang maipresentang ebidensya ang prosekusyon laban kay Enrile, mananagot pa rin ang senador sa kasong plunder dahil hinayaan niya ang kanyang pork barrel funds na mapunta sa pekeng foundations ni Napoles.

Si Enrile ay pansamantalang nakamit ang kalayaan makaraang payagan ng Korte Suprema na makapagpiyansa sa kanyang kasong plunder, habang ang dalawang kasamahan na sina Sen. Jinggoy Estrada at Sen. Ramon Revilla Jr., ay kapwa nakapiit pa rin sa PNP Custodial Center dahil sa kahalintulad na kaso.