18-anyos factory worker ginahasa ng holdaper

HINDI nakapalag ang isang lalaki nang arestuhin ng mga pulis makaraang gahasain ang hinoldap niyang isang 18-anyos dalagitang factory worker sa Meycauyayan City, Bulacan kamakalawa.

Sa ulat mula kay Supt. Lailene Amparo, hepe ng Meycauayan City police, ang biktima ay manggagawa sa isang pabrika ng pagkain sa nasabing lungsod.

Pormal nang sinampahan ng kasong rape ang naarestong suspek na si Dennis Durot, 30, residente ng Meycauayan Industrial State, Brgy. Iba, sa nabanggit ding lungsod.

Ayon sa ulat, pauwi ang biktima galing sa trabaho nang harangin at holdapin ng suspek na armado ng patalim.

Makaraang limasin ang pera at iba pang gamit, nagandahan ang suspek sa biktima kaya’t kinaladkad isang madamong bahagi ng lugar at walang-awang ginahasa.

Pagkaraan ay mabilis na tumakas ang suspek ngunit lingid sa kanyang kaalaman ay tinandaan ng biktima ang kanyang mukha.

Nagsumbong ang biktima sa himpilan ng pulisya at sa follow-up operations ay agad nasakote ang suspek.

Narekober sa pag-iingat ng suspek ang mga ninakaw sa biktima at patalim na ginamit sa krimen.