Tax collection pagbubutihin ng BIR

ANG pagpapabuti sa Collection ng buwis ang tututukan ngayon ng Bureau of Internal Revenue (BIR).

Ito’y makaraan ihayag na hindi magpapatupad ng panibagong tax measures ang pamahalaan.

Kinompirma ni BIR Commissioner Kim Henares, kasalukuyang nasa status quo ang komisyon at sinabing walang pagbabago sa tax rates, walang pagtaas ng tax at walang income tax cuts.

Siniguro ni Henares, dahil dito gagawin ng komisyon ang lahat nitong makakaya para makamit nila ang kanilang target collection.

Bagama’t mayroong panukala sa House of Representatives para mapababa ang income taxes, pinaliwanag ng Department of Finance at BIR, sa sandaling maaprubhanan ang panukalang tax cut, dapat magkaroon ng hakbang para i-offset ang losses sa koleksiyon.

Kabilang sa ikinokonsidera rito ang pagtaas ng Value Added tax (VAT).

Binigyang-diin ni Henares, hindi isinusulong ng pamahalaan ang pagtaas ng VAT rates mula sa 12% hanggang 14%.

Ayon kay Henares, kapag mababa ang tax rates, ibig sabihin magkakaroon nang kaunting budget para tugunan ang mga proyekto ng pamahalaan, gaya ng programa sa kahirapan at edukasyon.

Aniya, dapat tulungan din ng mga mambabatas ang pamahalaan para mapagbuti nito ang koleksiyon partikular ang pag-alis ng ‘bank secrecy for tax purposes’ at gawing ‘predicate crime’ ang tax evasion.