No. 1 si Mar sa survey, hahaha

SINO pa nga ba ang aasahang magiging number one sa survey na kinomisyon ng Liberal Party (LP) kundi si Interior Sec. Mar Roxas din mismo. Hindi naman siguro magpapa-survey ang LP kung hindi nito matitiyak na ang kanilang standard bearer ang siyang mangunguna.

 Ayon kay Rep. Egay Erice, ang internal survey na kinomisyon ng LP ay nagpapakita ng panalo ni Roxas laban kay Vice President Jojo Binay, kung ang presidential elections daw ay one-on-one sa pagitan ng dalawang kandidato.

Nakakuha raw ng 53 percent rating si Roxas, samantalang si Binay naman ay nakapagtala  ng 37 percent. Ang survey daw ay nationwide  at isinagawa ng professional polling firm matapos na ibigay ni Pangulong Noynoy Aquino ang endorsement kay Roxas.

Ang problema, hindi matukoy ni Erice kung anong grupo o firm ang nagsagawa ng nasabing survey.  Mahalaga ang pagkakakilanlan ng isang survey firm para maging lehitimo ang pagsasagawa ng survey, kung hindi, lalabas na peke o bogus ang trabaho nito.

At ipinagtanggol pa ni Senate President Franklin Drilon ang nasabing survey at iginiit na tunay na pinakomisyon ito ng LP.  Pero ang tanong nga, ano ang pangalan ng survey firm?  Dito kasi masusukat kung totoo nga ang nasabing survey o moro-moro lang.

Kaya nga kung si Atong Ma ng programang “Katapat” ang tatanungin tungkol sa survey, ito ang magiging tugon niya… hahaha, hahaha, hahaha!