P4-M droga nakompiska sa Davao Norte (4 patay, 9 arestado)

DAVAO CITY – Umabot sa P2.2 milyong halaga ng shabu at P1.7 milyong halaga ng marijuana ang nakompiska ng Davao del Norte PNP sa inilusad na simultaneous implementation ng warrant of arrest.

Matagumpay at sabay-sabay na nahuli ang siyam suspek sa operasyon laban sa illegal na droga, ng Davao Del Norte Police Provincial Office (DNPPO), CIDG Eastern Mindanao, RAIDSOTG 11, Ring Main Unit (RMU) 11, Highway Patrol Group (HPG) 11, Regional Public Safety Batallion (RPSB) 11, Regional Intelligence Unit (RIU) 11, CLO Davao del Norte, COMMEL 11 at PDEA 11, habang apat ang napatay nang pumalag sa mga awtoridad.

Ayon kay Davao del Norte Police Provincial Director, Sr. Supt. Samuel Gadingan, siyam na search Warrant ang kanilang ipinatupad kamakalawa sa mga lugar ng Tagum City, bayan ng Sto. Tomas at Asuncion at iba pang bahagi ng lalawigan ng Davao del Norte na nagresulta sa pagkakadakip sa siyam suspek, at pagkamatay ng apat iba pa nang pumalag sa pag-aresto.

Kinilala ang mga napatay na sina Hanran Saumay Sultan, Ronaldo Baquiran, Abi Nasser at Marvin Paguak.

Dagdag ni Gadingan, bukod sa pagtutulak ng illegal na droga, ang mga suspek ay sangkot din sa gun for hire at robbery hold-up.