Paslit patay, 5 naospital sa kamoteng kahoy (Sa North Cotabato)

KIDAPAWAN CITY – Binawian ng buhay ang 4-anyos batang lalaki habang limang iba pa ang naospital makaraan kumain ng kamoteng kahoy sa lalawigan ng Cotabato kamakalawa.

Kinilala ang biktimang namatay na si Mama Payag habang naospital ang kanyang mga magulang na sina Edris Payag at Tingga Payag, gayondin ang iba pang mga anak ng mag-asawa na sina Alibai, 3; Asarapia, 6, at Ali, 8, pawang mga residente ng Sitio Humalon, Brgy. Gli-Gli, Pikit, North Cotabato.

Ayon sa kapitbahay ng mga biktima na si Muslima La, isang midwife sa Cruzado Hospital, nakabili ng kamoteng kahoy ang ama ng mga biktima sa pamilihang bayan ng Midsayap, Cotabato.

Niluto ng pamilya ang nabiling kamoteng kahoy at kinain sa kanilang hapunan.

Makalipas ang isang oras ay nakaranas ng sobrang sakit ng tiyan, nagsuka, nag-LBM at nahilo ang mga biktima.

Agad binawian ng buhay si Mama dahil hindi nakayanan ang sobrang sakit ng kanyang tiyan at LBM.

Habang ang ibang mga biktima ay isinugod sa Cruzado Medical Hospital sa bayan ng Pikit at patuloy na inoobserbahan ng mga doktor.

Nakatakdang isailalim sa laboratory test ang kinain ng mga biktima na posibleng nahaluan ng wild kamoteng kahoy.