Magaling pa kay Houdini ang Pinoy Congressmen (Kung pagpapasa ng batas ang pag-uusapan…)

ISA raw po ‘yan sa kahusayan ng mga mambabatas na Pinoy sa Mababang Kapulungan.

Kahit siguro lagyan ng sandamakmak na kandado ang Kamara, makalulusot sila at makatatakas kahit sa oras ng deliberasyon.

‘Yan ang dahilan kung bakit laging walang ‘QUORUM’ ang attendance ng mga mambabatas kaya maraming mahahalagang batas ang hindi napagpapasyahan at naipapasa.

Kabilang sa mga importanteng batas na ‘yan ang Freedom of Information (FOI) Bill at Anti-Political Dynasty Bill.

Ang dalawang panukalang batas ang pinaniniwalaang kukupot kung hindi man tuluyang tatapos sa pamamayagpag ng korupsiyon sa bansa at magtutuldok sa pagmamalabis ng angkan-angkang mga politiko na hindi paglilingkod sa bayan ang ginagawa kundi paglilingkod sa kanilang mga bulsa.

Diyan nga raw sa Kamara, sa ROLL CALL lang kompleto ang congressmen.

After ng roll call… isa-isa nang nangawawala. Isa-isang nagtatayuan para humanap ng exit.

‘Yung iba nga raw nagkakairapan pa, kapag nagkakaunahan sa pagtayo…

Pero ‘yung iba naman, parang high school bulakbol  na nag-uusap pa kung saan sila daraan para hindi mahalatang hindi na sila babalik sabay hagikhik.

Mga BULAKBOL!

Ngayon magtataka pa ba tayo kung bakit hindi naipapasa ang mahahalagang batas na dapat sana’y tunay na makatutulong sa sinasabing ‘daang matuwid’ ni Noynoy?!

Sabi nga ni Pascual Racuyal, mas maigi pang gawing piggery ang Batasang Pambansa dahil pagkatapos ng anim na buwan siguradong may kita ang bayan.

Kaysa nga naman Kamara na puno ng mga bulakbol na mambabatas kaya walang maipasang masustansiyang batas bilang proteksiyon laban sa korupsiyon. 

Sayang, wala na si Racuyal…pwede siguro siyang kuning running mate nina Mar Roxas at Jojo Binay.

Iba talaga ang talentong pinoy!

KAMAKALAWA ng gabi ay nagkaroon tayo ng pagkakataon na mapanood ang HITMAN David Foster & Friends Asia Tour 2015 sa Araneta Coliseum.

Itinampok ng henyong singer, composer, songwriter ang mahuhusay na Filipinong mang-aawit na pinangungunahan ni Charice, Gerphil Flores at X-Factor Finalist Mark Mabasa.

Kasama rin nila sina Natalie Cole,  Boyz II Men, at ang Amercian Idol winner na si Ruben Studdard.

Lahat sila ay magagaling. May kanya-kanyang timbre at katangian ang boses. Pero ang nakatutuwa, noong kumanta si Charice, talaga namang iba ang ‘power’ ng kanyang  boses.

Umugong hanggang lumakas ang palakpakan at sa huli ay iginawad sa kanya ang standing ovation matapos itanghal ang mga awiting Through the fire, Lay me down, I will always love you at sa encore ay Bukas na lang kita mamahalin.

Nang mapanood at mapakinggan nang personal ng inyong lingkod ang performance nina Charice, Gerphil at Mark, lalo tayong nakombinsi na iba talaga ang talento ng mga Pinoy.

Lalo nang sabihin ni David Foster na bilib siya sa  husay ng mga Pinoy sa pag-awit.

At natutuwa siya na nagkaroon siya ng pagkakataon na makasama si Charice sa kanyang mga concert at show.

Mababang loob din na sinabi ni Foster, na kahit wala siya, ay hindi malayong sumikat sa buong mundo si Charice dahil sa kanyang husay sa pagkanta.

At dahil na rin kina Ellen DeGeneres  at Orpha na walang sawang nagpakita ng suporta sa batang singer.

Bukod kay Charice, nagbigay din ng makulay na performance  sina Gerphil Flores at X-Factor Phils. Finalist Mark Mabasa at iba pang random Filipino guests from the audience.

All praises talaga si Mr. Foster dahil sa kakaibang talent ng mga PINOY!

Marijuana vs palay, mais at camote

Kamakailan ay pinag-usapan sa komite ng Kamara ang tungkol sa House Bill No.  4477 o ang pagre-regulate bilang gamit-medikal  ng Marijuana.

Gayon din ang pagtatatag ng Medical Cannabis Regulatory Authority at paglalaan ng kaukulang pondo para rito.

Walang duda na totoong may medicinal benefits ang Cannabis o Marijuana sa ilang karamdaman. Pinatutunayan na ito ng siyensiya batay sa pananaliksik ng mga eksperto.

Ang agam-agam natin, ang mga lupaing  ga-gamitin para taniman ng Cannabis nang maramihan at ang maaaring pagpapalit ng produktong pananim ng mga magsasaka imbes pang-agrikultura ay marijuana na ang itanim.

Kung matatandaan natin sa industriya ng tabako,  ay lumago at dumami ang mga mana-nanim ng tabako sa bansa lalo na ‘yung nasa Ilokos.

Ito ay naging pangunahin kabuhayan ng mga Ilokano at ‘di hamak na mas malaki pa ang kinikita kompara sa mga magsasaka ng palay, mais, gulay, o kamote.

Maaaring mabawasan ang produksyon ng gulay tulad ng repolyo, petchay, beans, carrots, patatas at chicharo na bultuhan kung ibenta sa Divisoria at Balintawak gayon din  ang produksyon ng bulaklak na ibabagsak sa Dangwa.

Maging ang mga lupang pang-agrikultura sa Tagaytay ay maaring mapalitan na ang mga pananim na pinya, papaya at saging ng cannabis. 

Dahil siguradong mas mataas ang kikitain ng mga magsasaka ng Cordillera sa pagtatanim ng cannabis.

Alam ng Philippine Drug Enforcement Agency (PDEA) na sa malamig na lugar ay madaling tumubo at lumago ang pagtanim ng Cannabis.

Bago ipasa ang House Bill No.  4477 sa second reading ng Kamara kailangan ang masu-sing pag-urirat at pag-aralan pa ng Komite ang aspetong ito, lalo ang impact sa agricultural production na nakatuon sa ating Food Security. 

Sino ba dapat ang maaaring magtanim ng Marijuana?  Saan bang lugar sa bansa o probinsiya maari itong itanim?!

Dapat ay total control and supervision ang gawin sa produksiyon nito ng gobyerno. Nang sa gayon ay walang magmanipula at maabuso kung magiging batas nga ang mga panukalang ito.

Rock & roll to the world!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com