Enrile pinayagan mag-piyansa

PINAYAGAN si Senador Juan Ponce-Enrile ng Korte Suprema na makapaghain ng piyansa para sa kinakaharap na kasong plunder kaugnay sa multi-bilyong pork barrel scam. 

Sa botong 8-4, pinaboran ng mayorya ng mga mahistrado ng Korte Suprema ang P1 milyong piyansa kapalit ng pansamantalang kalayaan ng senador. 

Bukod sa argumentong mahina ang mga ebidensya laban sa kanya, iginiit ng batikang politiko na matanda na siya at may sakit pa. 

Kabilang sa mga mahistrado na tumutol sa pansamantalang pagpapalaya kay Enrile ay sina Chief Justice Maria Lourdes Sereno at Associate Justices Antonio Carpio, Estela Perlas-Bernabe, at Marvic Leonen. 

Masaya ang pamilya ni Enrile sa naging desisyon ng Supreme Court. 

Ayon sa anak niyang si Katrina, excited na silang makasama ang ama sa bahay. 

Sa pahayag ng abogado ni Enrile na si Joseph Sagandoy, sinabi niyang agad nilang babayaran ang piyansa para makalabas na ng detention facility ang senador. 

Kasalukuyang detinedo si Enrile sa PNP General Hospital sa Camp Crame.