Mandatory drug test sa bus drivers hikayat ng PDEA

HINIKAYAT ng Philippine Drug Enforcement Agency (PDEA) ang mga pinuno ng transport sector para ipatupad ang mandatory drug testing sa bus drivers.

Ayon kay PDEA Director General Undersecretary Arturo G. Cacdac, Jr., ito ay kaugnay sa insidente na kinasasangkutan ng Valisno bus noong nakaraang Miyerkoles sa Quirino Highway, Lagro, Quezon City, na ikinamatay ng apat pasahero habang 18 ang sugatan.

Ang driver ng bus na si George Pacis ay naaresto at positibo sa paggamit ng methamphetamine hydrochloride o shabu.

Sinabi ni Cacdac, batay sa kanyang obserbasyon, karamihan sa road accidents ay sanhi ng mga bus driver na lango sa ipinagbabawal na gamot.

“These incidents proved that there is a prevailing practice of illegal drug use among bus drivers,” pahayag ni Cacdac.

Umaasa si Cacdac na pagtutuunan na ng pansin ng transport sector ang pagsailalim sa drug test sa lahat ng mga driver.

“We will not wait until an accident happen on the road because the man behind the wheel is high on drugs,” giit ng PDEA chief.