NAGWAGI sa Grand Prix ang 1st Philippine Team sa Prague at 1st Place sa Star Rain sa Prague Talent Competition mula Agosto 4-8, ginanap sa Prague, Czech Republic.

Ang 1st Philippine Team ay pinamunuan ng opisyal na katuwang sa Asia para sa European Competitions of Leider Leis Musik Produktions, Berlin at Managing Director ng Vega Entertainment Productions (VEP) na si Ms. Charie L. Vega. Nakipagtunggali sa pitong (7) bansa sa Europe gaya ng Germany, Russia, Bulagaria, Ukraine, Switzerland, Malta at Czech Republic.

Ito ang unang pagkakataon na binuksan ng Europe ang kanilang pintuan sa mga Asian at ang Filipinas ang nag-iisa at tanging bansang Asyano ang inanyayahang lumahok sa kompetisyon.

Ang delegadong si KRISSEL JOY VALDEZ ang nagwagi sa GRAND PRIX title sa kanyang awit na “I Believe in You and Me” ni Whitney Houston at si ALYSSA HERNANDEZ bilang 1st place sa kanyang piyesang “Chandelier” ni Sia.

Pinaniniwalaang ang mga Filipino ay biniyayaan ng talento na kinilala na sa Asia at America kaya ngayong kinikilala na rin sa Europa ay isang bagay na dapat ipagmalaki ng mga Filipino.