Ama utas sa icepick ng anak

PATAY ang isang 40-anyos ama makaraan tarakan ng icepick ng sariling anak nang magkainitan makaraan ipagtanggol ng suspek ang kanyang live-in partner na nakaaway ng biktima sa Valenzuela City kamakalawa ng hapon.

Hindi na umabot nang buhay sa Valenzuela Medical Center ang biktimang si Resty Rafael, heavy equipment operator, residente sa 2023 Apolonia St., Brgy. Mapulang Lupa ng nasabing lungsod, sanhi ng isang tama ng saksak sa noo.

Habang pinaghahanap ang suspek na si Richard Rafael, 22, anak ng biktima, mabilis na tumakas kasama ang live-in partner, nakatakdang kasuhan ng parricide.

Batay sa ulat nina SPO3 Armando Delima at PO3 Ronaldo Subosa, dakong 1 p.m. nang maganap ang insidente sa tapat ng bahay ng isang Richard Arzala na kaanak ng mag-ama.

Napag-alaman, nagtalo ang mag-ama makaraan mag-away ang biktima at ang kinakasama ng suspek na humantong sa batuhan ng bote.

Nang makorner ang biktima ay agad siyang sinaksak sa noo ng anak gamit ang icepick na nagresulta sa kanyang kamatayan.

Patuloy na inaalam ng mga awtoridad kung ano ang pinagtalunan ng biktima at live-in partner ng anak na nagresulta sa insidente.

Rommel Sales