May-ari ng Kentex Gatchalian kasuhan — DoJ (Sa sunog sa pabrika)

INIREKOMENDA ng Department of Justice na sampahan na ng kasong administratibo at kriminal ang mga may-ari ng Kentex Manufacturing Corporation at ilang opisyal ng Valenzuela kaugnay sa sunog noong Mayo 13.

Pinakakasuhan na rin ang mga empleyado ng Ace Shutter Corp., ang kompanyang responsable sa isinagawang welding sa nasunog na pabrika ng tsinelas na mahigit 70 ang namatay.

Kabilang sa mga sasampahan ng reckless imprudence resulting in multiple homicide and multiple physical injuries sina Terrence King Ong (operations manager ng Kentex); Rosalina Uy Ngo (may-ari ng Ace Shutter Corp); Oscar Romero (empleyado ng Ace Shutter Corp); at Wilmer Arenal (empleyado ng Ace Shutter Corp) 

Samantala, paglabag sa fire code at anti-graft and corrupt practices act ang inirekomendang isampa kina Valenzuela Mayor Rex Gatchalian; Atty. Renchi May Padayao (office head ng Business Permit and Licensing Office [BPLO]); Eduardo Carreon (Licensing Officer ng BPLO); F/Supt Mel Jose Lagan (sinibak na hepe ng Valenzuela BFP); F/SInp Edgrover Oculam; at SFO2 Rolando Avendan.