6M lalahok sa Metrowide quake drill

INAASAHANG aabot sa lima hanggang anim na milyon ang lalahok sa sabayang earthquake drill sa Metro Manila sa Hulyo 30.

Muling ipinaalala ni Metropolitan Manila Development Authority (MMDA) Chairman Atty. Francis Tolentino na isasagawa ang drill, dakong 10:30 a.m. hanggang 11:30 a.m.

Partikular sa unang 45 segundo, aabisohan ang lahat na mag-drop, cover and hold.

Marami aniyang sirena ang tutunog, pati mga kampana ng simbahan.

Bukod sa umaga, magkakaroon din ng earthquake drill sa gabi, dakong 8 p.m. hanggang 9 p.m. ngunit sa Pasig lamang partikular sa Ortigas Business District na malapit sa West Valley Fault.

Sa gabi aniya, mawawalan ng koryente ang ilang lugar sa Pasig area, inaasahan ding bibigat ang trapiko.

Tiniyak ni Tolentino na pinaghahandaan ng pamahalaan ang sabayang earthquake drill at hinihimok ang lahat na seryosohin ito.

Jaja Garcia