Bagong train ticketing system umarangkada na

UMARANGKADA na ang bagong ticketing system sa Light Rail Transit (LRT) Line 2 nitong Lunes. 

Idinetalye ni Atty. Hernando Cabrera, spokesperson ng LRT, ang mga feature ng bagong ticketing system. 

Sa ngayon aniya, sa Legarda Station pa lang nabibili ang card na nagkakahalaga ng P20.00. 

“‘Yung card na first time mong bibilhin P20 kaya lang for the next four years gamit mo ‘yung card kasi sa ‘yo ‘yung card,” paliwanag ni Cabrera. 

Gayonman, wala nang expiration date ang load. Aabot sa P10,000 ang halaga ng load na pwedeng ipakarga sa card. 

Bagama’t sa ngayon ay sa Legarda pa lang ito maaaring mabili, pwede nang magpa-reload sa iba pang mga estasyon ng Line 2. 

Ayon kay Cabrera, posibleng sa Miyerkoles o sa Huwebes ay pwede na rin bumili ng bagong card sa Betty Go Belmonte Station. 

“Paisa-isa ‘yan hanggang sa lahat ng estasyon ng Line 2 pwede nang bumili ng ating bagong card system,” ayon pa sa opisyal.

Kapag 100-porsyento na ang pagpapatupad ng bagong sistema, makata-tandem na rin ng LRT ang ilang retailer para makapagbenta ng load. 

“Pwede na rin magpa-load sa labas ng estasyon. Pwede na sa mga mall, sa department stores, convenience store,” dagdag ni Cabrera. 

Maaari rin iparehistro ang card para kapag nawala ito ng pasahero, pwedeng dumulog sa itatalagang website at ipa-block ang naturang card. Pwede rin i-transfer ang load mula sa nawalang card patungo sa panibagong card na bibilhin ng commuter. 

Para masigurong hindi maaabuso ang mga card para sa senior citizens at mga may kapansanan, ipinaliwanag ni Cabrera na ibang kulay ang iilaw sa mga gate ng estasyon kapag ginamit ang card. 

“Kung gumamit ay bata pwede naming hulihin. Ibig sabihin inaabuso na ‘yung gamit na para sa matanda,” aniya. 

Kapag naging tagumpay ang mga public trial, inaasahang ito ang sistemang gagamitin hindi lang sa LRT kundi maging sa MRT.

Jaja Garcia