HATAW! D'yaryo ng Bayan hatawtabloid.com
CAGAYAN DE ORO CITY – Patay ang tatlong kasapi ng Citizen Armed Force Geographical Unit (CAFGU) habang pabalik na mula bakasyon sa Brgy. Hindangon, Gingoog City, Misamis Oriental kamakalawa.
Kinilala ang mga biktimang sina Ferry Abao, Ferman Abao at Fredo Sarlo, residente sa nasabing bahagi ng lalawigan.
Inihayag ni 58th IB, Philippine Army spokesperson Capt. Ernesto Endoso na ang ginawang pang-aatake ng mga rebelde ay hayagang gawaing terorista dahil lahat ng mga biktima ay nakasibilyan at walang bitbit na baril.
Sinabi ni Endoso, hindi pa man nakarating sa army patrol base ang mga biktima ay hinarang na sila at pinaulanan ng mga bala dahilan sa agaran nilang pagkamatay.
Isa aniya itong divertionary tactics ng rebeldeng grupo dahil patuloy ang kanilang rescue operation sa kasama nilang si PFC Adonis Lopiba na unang nabihag noong sumiklab ang enkwentro sa Brgy. Alagatan, Gingoog City.
Tinukoy rin ni Endoso na ang Guerilla Front 4-A ng mga rebelde na nagmula sa Caraga Region ang umatake sa kanilang mga tauhan.
