Balasahan sa PNP inaasahan

INAASAHAN na ang balasahan o major revamp sa key positions sa pambansang pulisya.

Ito’y kasunod sa pagkakahirang kay Police Director General Ricardo Marquez bilang bagong PNP chief.

Si Marquez ang Director for Operations ng PNP bago siya hinirang bilang bagong pinuno ng PNP.

Dahil sa pagkakatalaga kay Marquez at pagreretiro sa serbisyo ni retired PNP OIC chief Leonardo Espina, ilang key positions sa PNP ang nabakante ngayon.

Ayon kay PNP-PIO chief, Chief Supt. Wilben Mayor, isa sa pagtutuunan ng pansin ng bagong talagang PNP chief ang pagtalaga ng mga opisyal sa mga nabakanteng position.

Kinompirma ni Mayor na si Chief Supt. Jonathan Miano, ang hepe ng Northern Police District (NPD), ang naupo bilang bagong Director for Operations (DO) kapalit sa pwesto na iniwan ni Marquez.

Dagdag ni Mayor, aakyat sa puwesto si Police Deputy Director General Marcelo Garbo na deputy chief for Operations, at si Police Deputy Director General Danilo Constantino na hepe ng PNP Directorial Staff.

Habang bakante ang puwestong iniwan ni Espina, ang deputy chief for administration.

Kinompirma ni Mayor na ngayong Lunes magsisimula ng kanyang trabaho si Marquez bilang PNP chief.