9 patay sa gumuhong minahan sa Antique

ILOILO CITY – Siyam ang patay sa muling pagguho ng bahagi ng coal mine sa Semirara Island sa Caluya, Antique.

Sa inisyal na report, nangyari ang insidente dakong 4 a.m. kahapon ng madaling-araw sa Panian pit.

Ayon kay Antique Gov. Rhodora Cadiao, umabot sa siyam ang namatay batay sa pagkompirma sa kanya ni Victor Consunji ng Consunji Group na may-ari ng minahan.

Tatlo pa lamang aniya sa mga bangkay ang na-recover batay sa text message na ipinaabot sa kanya.

Ayon sa gobernadora, ilang araw na rin nakararanas ng pag-ulan sa isla bago nangyari ang pag-collapse ng wall dakong madaling araw.

Patuloy ang pangangalap ng impormasyon sa pagkakakilanlan ng mga biktima.

Ang nabanggit na minahan ay pag-aari ng Consunji Group, na noong 2013 ay gumuho rin ang ilang bahagi na ikinamatay ng lima katao.