Responsable sa rubout sa Maynila mananagot (Tiniyak ng PNP)

TINIYAK ng Philippine National Police (PNP) na pananagutin ang limang pulis-Maynila sakaling mapatunayang nagkasala sila sa pagkamatay ng isang hinihinalang holdaper.

Magugunitang naka-enkwentro ng mga tauhan ng Manila Police District (MPD) sa Sampaloc ang biktimang tricycle driver at isa pang lalaking nakatakas.

Makikita sa CCTV footage ng barangay kung paano binaril ng isang pulis ang driver na nakaluhod na at nakataas pa ang mga kamay.

Sinabi ni S/Supt. Rustico Bascuguin, Deputy District Director for Administration ng MPD, iniimbestigahan nila ang insidente at tiniyak niyang magiging patas sila. 

Dagdag ni Bascuguin, hindi nila kinokonsinti ang pagbaril sa sino mang suspek lalo’t sumusuko na.

Nauna nang sinibak sa puwesto ang limang pulis, kabilang na ang precinct commander ng Gulod na si S/Insp. Rommel Salazar, at apat niyang mga tauhang sina PO3 Ferdinand Valera, PO1 Ronald Depasina, PO1 Ruel Landrito at PO1 Jomar Landoy.

Una na rin dumipensa ang MPD Station 4 na ipinangtanggol lang ng isang pulis ang sarili kaya nabaril at napatay ang isa sa dalawang suspek.