Basura ng Canada haharangin ng Tarlac LGU

HAHARANGIN ng provincial government ng Tarlac at ng lokal na pamahalaan ng Capas ang mga karagdagang container van ng basura ng Canada na itatapon sa kanilang landfill.

Iginiit ni Capas Mayor TJ Rodriguez, pag-aari pa rin ng lokal na pamahalaan ang landfill at nakasaad sa kanilang ordinansa na tanging mga basura lamang mula sa Pampanga, Tarlac, Baguio at Metro Manila ang maaaring itambak doon.

Hindi aniya nagpaalam sa kanila ang pamunuan ng landfill para dalhin doon ang mga basura ng Canada na anila ay pawang household waste lamang.

“Ang tanong po, ganito, bakit napakalaki ng Canada, bakit napakalayo ng Canada, kung ito ay household waste lamang, bakit sila gagastos nang ganito kalaki para lang itapon sa Filipinas ang basura nila,” giit ng alkalde. 

Inamin ni Rodriguez na mayroon silang hindi pagkakaunawaan sa tagapangasiwa ng 100 ektaryang landfill na Metro Clark Waste Management Corporation (MCWMC).