500-M Napoles assets ipinakokompiska ng US

NAKATAKDANG makipag-ugnayan ang gobyerno at korte ng Filipinas sa US Justice Department dahil sa ipinataw na forfeiture sa assets ng binansagang pork barrel scam queen na si Janet Lim-Napoles.

Nabatid na umaabot sa $12.5 million o katumbas nang mahigit P500 million ang ipinababawi ng Estados Unidos.

Kabilang sa sakop ng civil forfeiture complaint ang property ni Napoles sa Los Angeles condominium, isang motel malapit sa Disneyland, at Porsche Boxster na binili para sa anak niyang si Jeane Catherine Napoles.

Nabatid na isinampa ang kaso sa Los Angeles Federal District Court.

Giit ni Assistant Attorney General Leslie Caldwell ng Justice Department, hindi sila papayag na maging playground ng korupsiyon at pagtaguan ng mga ninakaw na yaman ang kanilang bansa.

Si Napoles ay kasalukuyang nakakulong sa Women’s Correctional sa lungsod ng Mandaluyong dahil sa kasong serious illegal detention na isinampa ng kanyang kaanak na si Benhur Luy.