Army special forces ex-member tiklo sa droga, granada

ZAMBOANGA CITY- Swak sa selda ang isang dating kasapi ng Army Special Forces makaraan mahulihan ng hinihinalang shabu at granada sa loob ng kanyang bahay sa Brgy. Tugbungan sa Zamboanga City kamakalawa.

Kinilala ng Zamboanga City police station 6 ang suspek na si Mark Joseph Bolivar Batallones, 27-anyos.

Nabatid na na-AWOL sa kanyang serbisyo ang suspek nitong nakaraang taon habang naka-assign sa 5th Special Forces Battalion sa Pikit, North Cotabato.

Ang pag-aresto sa suspek ay sa pamamagitan ng search warrant na inilabas ng korte nitong Hunyo 23.

 Dalawang pakete ng hinihinalang shabu ang nakuha ng mga pulis sa loob ng bahay ng suspek, gayondin ang drug paraphernalia at isang MK-II Fragmentation grenade.

Pinabulaan ng dating sundalo ang paratang sa kanyang ng mga awtoridad ngunit ayon sa record ng pulisya, matagal na nilang minamanmanan ang suspek dahil sa ilegal na transakyon sa ipinagbabawal na gamot sa lugar.