Abaya bakit ‘di kasama sa kinasuhan sa MRT deal? (Tanong ni Sen. Grace Poe)

KINUWESTIYON ni Senador Grace Poe ang hindi pagkakasama ni Transportation Secretary Joseph Emilio Abaya sa mga pinakakasuhan ng Ombudsman kaugnay ng anomalya sa Metro Rail Transit (MRT).

Nahaharap sina dating general manager Al Vitangcol III at limang iba pa dahil sa pinasok na maintenance contract ng MRT-3.

Iginiit ng Ombudsman, ginamit ni Vitangcol ang kanyang posisyon para maipagkaloob ang kontrata ng maintenance sa PH Trams-CB&T joint venture na konektado ang kanyang uncle-in-law.

Inihayag ni Poe, pinuno ng Senate Committee on Public Services, pag-aaralan niya ang resolusyon ng Ombudsman para matukoy kung bakit hindi kabilang dito si Abaya gayong nilagdaan niya ang maanomalyang maintenance contract.

Nilinaw ng senador, iginagalang niya ang findings ng Ombudsman at pabor siya sa paghahabla kay Vitangcol at sa limang incorporators ng Philippine Trans Rail Management and Services Corp.