2 CA justice tinukoy ni Trillanes (‘Sinuhulan’ ng mga Binay)  

PINANGALANAN ni Sen. Sonny Trillanes nitong Lunes ang dalawang Court of Appeals (CA) justice na sinasabing sinuhulan ng mga Binay upang makakuha ng temporary restraining order (TRO).

Batay sa apat pahinang Senate Resolution No. 1265 na inihain ni Trillanes, pinaiimbestigahan niya sa Committee on Justice and Human Rights ang sinasabing “justice for sale” sa hudikatura partikular ang pagtanggap ng suhol nina Associate Justices Jose Reyes Jr. at Francisco Acosta.

Sinasabing tig-P25 milyon ang tinanggap ng dalawa kapalit ng TRO at writ of preliminary injunction sa suspension order ni Makati Mayor Junjun Binay.

Ayon aniya sa kanyang mapagkakatiwalaang sources, nag-facilitate sa pag-uusap sa pagitan nina Binay at ng dalawang associate justices ang isang Atty. Pancho Villaraza.

Matatandaan, sa kabila ng pag-isyu ng Office of the Ombudsman ng suspension order ay pinigil ng CA ang kautusan.

Dahilan ito para mawalan ng Vice Mayor ang Makati bunsod ng pag-aktong alkalde ni Vice Mayor Kid Peña bilang pagsunod sa kautusan ng Department of Interior and Local Government (DILG).

Niño Aclan