Pag-etsapuwera kina Roxas at Espina, masyadong sablay — Lacson

Nilinaw ni dating Senador Panfilo Lacson na hindi totoong walang chain of command sa Philippine National Police at nilabag ito nina Pangulong Aquino at dating Chief PNP Alan Purisima nang ietsapuwera sina Department of Interior and Local Government Secretary Mar Roxas at PNP OIC Deputy Director General Leonardo Espina sa pulong kaugnay sa operasyon sa Mamapasano, Maguindanao.

Ani Lacson, kahit sibilyan ang karakter ng PNP ay mayroon itong chain of command na nalabag nang inilihim nina Aquino, Purisima at sinibak na PNP-Special Action Force (SAF) chief Director Getulio Napenas kina Roxas at Espina ang operasyon sa Mamapasano nitong Enero 25.

Bago pumasok sa politika, naging Chief PNP si Lacson kaya nilinaw niya na sa ilalim ng chain of command ay may respeto hindi lamang nagmumula sa “bottom to top” kundi dapat sa “top to bottom.”

“Ang ibig sabihin nu’n kung ikaw ay commander in chief o Chief PNP, dapat na obserbahan at respetohin mo rin ‘yung chain of command,” diin ni Lacson. “Sa meeting sa Malacañang noong January 9, silang tatlo lang (Aquino, Purisima at Napenas) lang ang nag-meeting. Nagkaroon ng disrespect sa chain of command dahil kahit naroon si Gen. Purisima ay kailangang naroon din si Gen. Espina.”

“On the part of the President, being the commander in chief, dapat sinabihan o isinama rin niya si Gen. Espina sa meeting na ‘yun kahit kinokonsulta niya si Gen. Purisima,” dagdag ni Lacson na nag-resign nitong Pebrero 10 bilang miyembro ng Gabinete ni Aquino. “The President as commander in chief of all armed and police forces in the country shoul have told Gen. Purisima and Sec. Roxas about the plan to capture or kill Malaysian bomb expert Zulkifli bin Hir, also known as Marwan.”

Ani Lacson, malaki ang pagkakamali nina Aquino, Purisima  at Napenas nang ituloy ang SAF operation nang lingid sa kaalaman ng dapat kasama sa plano na sina Roxas at Espina.

“Ano ang motibo ni Purisima nang sabihan si Napenas na huwag munang sabihan sa SAF operation sina Roxas at Espina?” dagdag ni Lacson. “Wala namang masama sa pagkonsulta kay Purisima pero ang masama ay ang pag-etsapuwera kina Roxas at Espina na posibleng pinag-ugatan ng problema sa koordinasyon sa inilunsad na operasyon sa isang high-value target na si Marwan.”