Lider ng magsasaka binistay ng bala

CAMP OLIVAS, Pampanga – Hindi na umabot nang buhay sa pagamutan ang isang 64-anyos lider magsasaka makaraan bistayin ng bala nang malapitan ng dalawa sa apat armadong kalalakihan na lulan ng motorsiklo sa tapat ng kanyang bahay nitong Linggo sa Brgy. San Jose, bayan ng San Simon ng lalawigang ito.

Base sa ulat ni Chief Inspector Michael Riego, hepe ng San Simon Police, sa tanggapan ni Chief Supt. Ronald Santos, PRO-3 director, isinugod ng mga kapitbahay sa ASCOM Medical Center sa bayan ng Apalit ang magsasakang si Severino Soreano, ng San Jose Village, San Simon, Pampanga, treasurer ng San Jose Farmers Irrigation Association, ngunit idineklarang dead on arrival dahil sa apat na tama ng bala ng kalibre .45 baril sa iba’t ibang bahagi ng katawan.

Sa pagsisiyasat ng pulisya, sinasabing maaaring alitan sa lupa o sa irrigation canal ang dahilan ng pagpaslang sa biktima.

Ayon sa salaysay ng mga kapitbahay, masayang nakikipagkuwentohan ang biktima nitong Linggo dakong 6:30 p.m. nang dumating ang mga suspek na lulan ng dalawang motorsiklo saka pinagbabaril ang biktima.

Leonila Arevalo