Kawal ng SAF sa Cebu pinarangalan ni Roxas bilang mga bago bayani

NAGSADYA si Interior and Local Government Secretary Mar Roxas sa Cebu nitong Sabado upang dalawin ang pamilya nina PO1 Romeo Cempron at PO1 Windel Candano na kabilang sa 44 kasapi ng Philippine National Police – Special Action Force (PNP – SAF) na namatay sa Mamasapano, Maguindanao.

Pinayuhan ni Roxas ang asawa ni Candano na si Michelle na ilaan ang panahon sa pitong-taon gulang na anak para sa bagong buhay sa kabila ng trahedyang sinapit ng asawa sa pagtupad sa tungkulin.

Para kay Michelle, empleado ngayon ng Philippine Postal Corporation sa Cebu, gusto niyang maranasan ang buhay bilang kawal ng SAF upang lubos niyang maunawaan ang pagsasakripisyo ng buhay ng kanyang mister.

Ibinahagi naman ni Dra. Christin Cempron ang masasayang alaala nila bilang mag-asawa ni Romeo na namatay din sa insidente sa Mamasapano.

Sinabi rin ni Roxas sa pamilya ng tanyag ngayon bilang “Fallen 44” na may panahon sila para magdalamhati pero hindi dapat mag-alala sa kanilang kinabukasan dahil si Pangulong Aquino, ang DILG, PNP, National Police Commission (Napolcom) at iba pang ahensiya ng gobyerno ay hindi magpapabaya at pagkakalooban sila ng pinansiyal, edukasyonal, pangkabuhayan, medikal, pabahay at iba pang porma ng tulong.

Nangako rin siya sa pamilya ng mga namatay at nasugatan sa pangyayari sa Mamamapasano na matatamo nila ang katotohanan at katarungan sa itinatag niyang Board of Inquiry para alamin ang tunay at buong pangyayari kaugnay ng operasyon ng SAF.

Kapwa ininilibing sina Cempron at Candano nitong Linggo matapos tumanggap ng parangal bilang mga bagong bayani sa pag-aalay ng kanilang buhay para sa bayan.