2 nakipaglamay paglalamayan na rin (Tepok sa ligaw na bala)

PATAY ang 50-anyos lalaki at 3-anyos batang babae na sinasabing tinamaan ng ligaw na bala habang nasa lamayan sa Taguig City kamakalawa ng gabi.

Hindi na umabot nang buhay sa Pasig Medical City ang mga biktimang sina Lino Buenaflor, 50, at Xyriel Andal, 3, ng Kalayaan St., Brgy. Ususan, Taguig City .

Ang dalawa ay tinamaan ng bala mula sa hindi pa batid na kalibre ng baril.

Patuloy pang inaalam ng Taguig City Police kung sino ang taong responsable sa pamamaril.

Base sa ulat na nakarating kay Taguig City Police chief, Sr. Supt. Arthur Felix Asis, dakong 8 a.m. nang mangyari ang insidente sa burol ng patay sa Kalayaan at P. Mariano Streets, Brgy. Ususan ng siyudad.

Bigla na lamang nakarinig ng ilang putok ng baril ang mga nakikipaglamay at pagkaraan ay bumagsak na duguan ang mga biktima.

Isinugod sila sa pagamutan ngunit kapwa idineklarang dead on arrival. 

Jaja Garcia