Mag-asawa ninakawan misis pinatay

CAUAYAN CITY, Isabela – Wala pang natutukoy ang mga imbestigador ng San Mateo Police Station na suspek sa panloloob sa bahay ng mag-asawang matandang negosyante sa Brgy. 4, San Mateo, Isabela kamakalawa.

Ito’y nagresulta sa pagkamatay ng 81-anyos negosyanteng si Marcelina Penia habang nasugatan ang kanyang mister na si Leonardo, 84-anyos, nilalapatan ng lunas sa isang pribadong ospital sa Santiago City.

Sinabi ni Sr. Inspector Romeo Tilios, hepe ng San Mateo Police Station, umaabot sa P100,000 cash at alahas ang natangay ng magnanakaw.

Ang nakaligtas na si Lolo Leonardo ay pinalo sa mukha habang ang kanyang misis ay pinalo sa ulo na naging sanhi ng kanyang kamatayan.

Walang forcible entry sa bahay ng mag-asawa kaya kabilang sa mga tinitingnan nilang anggulo ay maaaring kakilala ng mga biktima ang suspek.

Inanyayahan nila sa himpilan ng pulisya ang 10 trabahador na nagsasagawa ng renovation sa bahay ng mag-asawa.

Sila ang unang nakatuklas sa nangyari sa mag-asawang Penia dakong 7 a.m.

Aalamin ng mga tagasiyasat kung may napansin ang mga trabahador na kahina-hinala nang umalis sila kamakalawa.