Arrival honors sa PNP-SAF wala sa esked ni Pnoy (Depensa ng Palasyo)

BINIGYANG-DIIN ni Comunications Secretary Herminio Coloma Jr., walang katotohanan ang paratang kay Pangulong Benigno Aquino III kahapon na mas inuna pa ang pagdalo sa inagurasyon ng bagong planta ng Mitsubishi Motors Corporation sa Sta. Rosa, Laguna, kaysa salubungin ang bangkay ng 44 miyembro ng Philippine National Police-Special Action Force (PNP-SAF) mula sa Mamasapano, Maguindanao.

“Wala pong ganoong kaganapan, ‘yung ‘mas pinili.’ Talaga pong wala sa kanyang schedule ‘yan,” ani Coloma.

Paliwanag ni Coloma, nailatag na ang mga kaganapan para sa National Day of Mourning ngayon sa Camp Bagong Diwa sa Bicutan, Taguig City at pamumunuan ni Pangulong Aquino ang luksang parangal para sa mga namatay na kasapi ng SAF.

Giit ni Coloma, naipahayag na ng Pangulo ang kanyang buong pusong pakikidalamhati sa President’s Message to the Nation kamakalawa kaya nga nagdeklara siya ng National Day of Mourning.

Batay sa ulat, inaasahan ng mga opisyal ng PNP ang pagsalubong ng Pangulo sa labi ng mga pulis na tinawag niyang mga bayani kamakalawa ng gabi.

Inulan ng batikos si Pangulong Aquino mula sa netizens na kumuwestiyon sa kanyang desisyon na makipag-kiskisang-siko sa mga negosyante imbes makiramay sa mga naulilang pamilya ng mga pulis.

Sinabi ni Kabataan party-list Rep. Terry Ridon, ang pasya ni Aquino na bisitahin ang planta ng kotse ay nagpakita ng kawalan ng respeto ng Commander-in-chief sa kanyang mga tauhan.

Rose Novenario