Mag-utol na paslit dedbol sa sunog

PATAY ang magkapatid na paslit nang masunog ang tinitirhan nilang barong-barong sa Tondo, Maynila kahapon ng madaling araw.

Namatay habang ginagamot sa Jose Reyes Memorial Medical Center ang magkapatid na sina Princess Apple Sta. Maria, 5, at Anna Marie, 2, kapwa residente sa tabi ng relis sa pagitan ng F. Yuseco at Batangas streets, sa Tondo, sanhi ng 3rd degree burns.

Sa report ng Bureau of Fire Protection, dakong 2 a.m. nang nagsimula ang sunog sa bahay ng mga biktima.

Nauna rito, lumabas ang ina ng mga biktima na si Josephine, 34, para bumili ng pagkain ng kanyang mga anak ngunit pagbalik ay nakitang nagliliyab na ang barong-barong

Nabatid na kandila lamang ang gamit na ilaw sa bahay ng mga biktima kaya hinihinalang ito ang dahilan kung bakit nasunog ang kanilang bahay.

Hinala ring mahimbing na natutulog ang mga biktima kaya hindi sila nakalabas ng kanilang bahay.

Ilang residente ang nagtulong-tulong na maapula ang apoy at inilabas ang mga bata saka isinugod sa ospital ngunit dakong 9 a.m. ay ideklarang patay na.

Samantala, isang sunog din ang sumiklab sa Sevilla Street, Binondo, Maynila na umabot sa ikaapat na alarma.

Napag-alaman, sampung bahay ang natupok sa sunog na hindi pa batid ang naging sanhi.

Leonard Basilio