HATAW! D'yaryo ng Bayan hatawtabloid.com
INAMIN ni Department of Interior and Local Government (DILG) Secretary Mar Roxas na malaking hamon sa seguridad ang limang araw na pagbisita ni Pope Francis sa Pilipinas dahil sa malaking bilang ng mga Pilipino na gustong makita nang personal ang Santo Papa.
Nakatakdang bumisita si Pope Francis sa Pilipinas mula Enero 15 hanggang Enero 19 kaya puspusan ang preparasyon ng mga kagawaran ng gobyerno tulad ng DILG at Department of National Defense (DND) na magtatalaga ng dalawang batalyon ng mga puwersang naging peacekeepers ng United Nations at beterano sa Golan Heights.
Sa Enero 16, magsasadya si Pope Francis sa Malakanyang upang makipagkita kay Pangulong Benigno Aquino III bilang pinuno ng isang bansa na kinakatawan ng Vatican City.
“Napakalaking hamon para sa lahat ng ahensiya ng pamahalaan ang pagbisita ng ating Santo Papa,” sabi ni Roxas. “Kaya lahat ng kinauukulang ahensiya tulad ng Philippine National Police (PNP) at Armed Forces of the Philippines (AFP) ay nasa lubos na paghahanda ngayon.”
Ipinaalala ni Roxas lalo sa intelligence community na hindi na dapat maulit ang “Oplan Bojinka” o tangkang pagpatay kay Pope John Paul II na isa nang santo ngayon nang dumalaw sa Pilipinas noong 1995.
Natuklasan ang tangkang pagpaslang nang magkasunog sanhi ng kemikal sa isa sa mga kuwarto sa Doña Josefa Apartments sa Malate, Maynila na inuupahan ng mga ekstremistang Muslim sa pangunguna ng teroristang Pakistani-Palestinian na si Ramzi Yousef.
“Dapat mas doble at matindi ang pagbabantay ng pulisya at militar ngayon sa nalalapit na pagbisita ni Pope Francis,” dagdag ni Roxas. “Malaki ang maitutulong kung magiging mapagbantay ang lahat ng mamamayan lalo kung susunod sila sa lahat ng patakaran sa seguridad na ipatutupad ng mga awtoridad.”
