TRO ng SC vs LRT/MRT fare hike ‘itinuro’ ng Palasyo

TANGING ang ipalalabas na temporary restraining order (TRO) ng Supreme Court (SC) ang makapipigil sa Department of Transportation and Communication (DoTC) sa pagpapatupad ng taas ng pasahe sa LRT/MRT.

Ayon sa Malacanang, tanging ang korte lamang ang makapagdedesisyon kaugnay sa naka-ambang fare increase.

Magiging epektibo ang pagtaas ng pasahe ng LRT at MRT sa Enero 4, 2015.

Ayon kay Deputy Presidential Spokesperson Abigail Valte, kanila nang inaasahan na maraming grupo ang kukwestiyon kaugnay sa bagong fare hike na ipatutupad ng DoTC sa LRT at MRT.

Nakahanda aniya ang pamahalaan sakaling hihilingin ng Supreme Court ang kanilang paliwanag kaugnay sa bagong fare hike.

Giit ni Valte, hihintayin na lamang kung ano ang magiging desisyon ng korte kung magpapalabas ito ng TRO o hindi.

Sa kabilang dako, ipinauubaya ng Malacanang sa DoTC ang pagpapaliwanag kaugnay sa pagtaas ng pasahe ng LRT at MRT.