Samboy Lim comatose sa ICU

KASALUKUYANG comatose sa ICU ng Medical City ang kilalang PBA legend Avelino ‘Samboy’ Lim makaraang mag-collapse habang naglalaro sa legends basketball match sa Ynares Arena sa Pasig City nitong Biyernes, Nobyembre 28.

Naglalaro pa lang ng ilang minuto ang kinilalang ‘Skywalker’ ng San Miguel Beermen nang magreklamo sa pamamanhid ng kanyang braso. Kasunod nito’y bumagsak na ito at nawalan ng malay kaya dagliang isinugod sa pinakamalapit na ospital.

Ayon sa kasamang PBA great Nelson Asaytono, nag-uunat ng kanyang katawan si Lim, 53, matapos na ilabas sa laro nang siya’y mag-collapse.

Naging emosyonal naman si Kenneth Duremdes, dating Most Valuable Player ng PBA at isa sa 25 Greatest Players ng liga, nang malaman ang nangyari kay Lim, na ngayon ay comatose sa Medical City.

Nagsasagawa ng vigil ang mga kasamahan ng PBA legend para sa madaling recovery nito.

“I’m devastated. Kasama dapat ako riyan,” ani Duremdes sa kanyang text message sa media.

“Kasama dapat ako diyan sa Legends Game kaso may pocket tournament kami ng Adamson dito sa Tagaloan, Cagayan de Orom” dagdag niya.

Sinabi rin ng 1998 PBA MVP at kasalukuyang head coach ng Adamson Falcons sa UAAP na lumaki siyang iniidolo ‘Ang Skywalker’ at sa katunayan ay naka-bonding niya ito bilang bahagi ng PBA Legends Tour dalawang taon ang nakalipas.

“Roommate kasi kami nung 2012,” ani Duremdes.

Nagsimula si Lim sa paglalaro ng basketball sa Letran Knights at Northern Consolidated Cement national team bago napasama sa San Miguel Beer sa PBA noong 1986. Kinilala siya bilang ‘Skywalker’ dahil sa kanyang abilidad na lumundag na animo’y lumilipad sa alapaap. Pinangalanan siya bilang isa sa 25 Greatest Players List ng PBA noong silver anniversary ng liga taon 2000.

Ilan sa mga nakasabay ni Lim sa pagsikat sa basketball sina Allan Cai-dic, Hector Calma, at ang iba pang mga manlalaro ng San Miguel Beermen.

Tracy Cabrera