HATAW! D'yaryo ng Bayan hatawtabloid.com
BINAWIAN ng buhay ang isang tambay makaraan pagtulungang gulpihin at saksakin ng limang construction worker dahil lamang sa agawan ng upuan sa isang lugawan kahapon ng madaling-araw sa bayan ng Binangonan, Rizal.
Kinilala ni Binangonan Police chief, Chief Insp. Bart Marigondon ang biktimang si Daniel Pangan, 27, jobless, ng Sitio tambubong, Brgy. Tayuman ng nasabing bayan.
Habang arestado ang dalawa sa mga suspek na si Mario Maga, 18, at isang alyas Ron, 17, kapwa ng Sitio San Jose, Brgy. Pag-asa.
Patuloy na tinutugis ang iba pang mga suspek na si Roberto ‘Jun’ Delantar, 32, kapatid niyang si Dodoy, 32, at Rey Gonzaga, 20, pawang residente ng Sitio Kambingan, Brgy. Tayuman ng nasabi ring bayan.
Ayon sa ulat, dakong 12 a.m. nang mangyari ang insidente sa Sitio Tambubong, Brgy. Tayuman, Binangonan, Rizal.
Napag-alaman, dumating ang biktima kasama ang tatlong babae para kumain ng lugaw ngunit wala silang maupuan dahil maraming kustomer.
Nang makita ng biktima ang mga suspek na katatapos lamang kumain at nagpapahinga ay tinanong kung tapos na silang kumain na ikinagalit ni Jun Delantar.
Humantong ito sa mainitang pagtatalo hanggang sa kuyugin ng mga suspek ang biktima. Pagkaraan ay mabilis na tumakas ang mga suspek ngunit agad nadakip ang dalawa sa kanila.
Isinugod sa pagamutan ang biktima ngunit hindi na umabot nang buhay.
Mikko Baylon
