2 todas sa anti-drug raid sa Las Piñas

DALAWA ang patay sa pagsalakay ng mga pulis sa hinihinalang drug den sa Brgy. Talon Singko, Las Piñas City kahapon.

Ayon kay Las Piñas Police Chief Boyet Samala, dakong 6 a.m. nang salakayin ng mga awtoridad ang target na bahay para magsilbi ng search warrant ngunit agad silang sinalubong ng mga putok.

Sa pagsiklab ng barilan, napuruhan ang suspek na si Mandy Sulayman Abubakar at isang hindi pa nakikilalang salarin. Isinugod sila sa pagamutan ngunit hindi na umabot nang buhay.

Narekober ng mga pulis sa sinalakay na bahay ang ilang armas kabilang ang dalawang kalibre .45 baril, isang kalibre .22, isang .38 revolver, isang 9MM pistol, isang hand grenade at mga bala.

May nakuha ring isang kilo ng hinihinalang shabu, drug paraphernalia at limang digital weighing scale ang mga awtoridad.

Ayon kay Samala, ikinasa nila ang pagsalakay makaraan makatanggap ng report na maraming armas sa naturang bahay ni Abubakar.

Jaja Garcia