HATAW! D'yaryo ng Bayan hatawtabloid.com
ZAMBOANGA CITY – Umabot sa mahigit siyam na oras ang hostage drama sa Zamboanga City bago tuluyang napasok ng mga pulis ang bahay ng isang lalaki at nailigtas ang kanyang dalawang anak na lalaki sa Manggal Drive, Brgy. Baliwasan.
Ayon kay Zamboanga City police director, Senior Supt. Angelito Casimiro, bago nangyari ang pag-hostage ng suspek na si Nur Sakiram Alvarez, 40, kahapon ng umaga, tinaga niya ang kanyang biyenan na si Sara Abdulsaid na agad naitakbo sa ospital.
Nang magresponde ang mga awtoridad ay ini-hostage ng suspek ang kanyang dalawang anak sa loob ng kanilang bahay.
Dakong 3 p.m. kahapon nang gumamit ng tear gas ang mga pulis at SWAT team hanggang sa matagumpay na nakuha ang dalawang anak ng suspek na sina Fahad Sakiram, 15, at si Faizal Sakiram, 14-anyos.
Inihayag ni Casimiro, nagsimula ang hindi pagkakaunawaan ng suspek at ng kanyang biyenan nang malaman na may isinusumbong sa kanyang misis na ngayon ay nagtatrabaho bilang isang oversease Filipino worker (OFW) sa Oman, Qatar.
Lumalabas din ang ibang version na nalaman ng suspek na may iba nang kinakasama ang kanyang misis sa abroad kaya nauwi sa matinding galit ng salarin.
