HATAW! D'yaryo ng Bayan hatawtabloid.com
ROXAS CITY – Nagbaril sa sarili ang isang 66-anyos mister nang mapundi sa walang katapusang pagseselos ng kanyang misis kahapon ng umaga sa kanilang bahay sa Andrada Subdivision, Brgy. Banica, Roxas City.
Duguan at wala nang buhay nang madatnan ni Sally Alis ang mister na si Romeo Alis, nagbaril sa ulo gamit ang .38 caliber revolver.
Ayon sa anak ng mag-asawa na si Melvin, halos araw-araw nag-aaway ang kanyang mga magulang dahil sa pagseselos ng ina at pagdududa na may ibang babae ang ama.
Ilang araw bago ang insidente ay nagkwentohan ang mag-ama at umamin ang biktima na gusto na niyang magpakamatay dahil nagsasawa na siya sa araw-araw nilang pag-aaway ng misis na selos ang parating pinagmumulan.
Napag-alaman, pupunta sana sa kanilang palaisdaan si Romeo nang humarang sa daan ang misis kaya nagdesisyong ipagpaliban ang lakad.
Pagkaraan ay nagtungo sa kusina ang biktima naupo, itinutok sa ulo ang baril saka ipinaputok. (B. JULIAN)
