HATAW! D'yaryo ng Bayan hatawtabloid.com
LEGAZPI CITY – Hanggang ngayon ay binibigyang pa rin ng lunas sa ospital ang 28-anyos negosyante makaraan pagsasaksakin ng kasama niyang driver sa isang lodging house sa Tabaco City, Albay kamakalawa.
Kinilala ang biktimang si Oliver Victa y de Jesus, tubong Bulacan.
Sa ulat mula sa Tabaco City Police Station, napag-alamang kapwa nakainom ang biktima at ang kasama niyang driver na si Virgilio Aquino, Jr., nang pumasok sa isang lodging house para magpalipas ng gabi.
Ilang sandali lamang ang lumipas nang magkainitan ang dalawa sa loob.
Dito na pinasok ng mga empleyado ng nasabing lodging ang dalawa at nakitang nakabulagta at duguan ang biktima.
Sa kwento ng suspek na si Aquino, nagpapaalam lamang siyang umuwi sa kanilang bayan sa Camarines Norte ngunit hindi pumayag ang biktimang si Victa.
Dahil dito, nagdilim aniya ang kanyang paningin kaya inundayan ng saksak ang kasama.
Sa ngayon ay nakakulong na ang suspek habang kritikal pa rin sa ospital ang biktima.
Ang dalawa ay matagal na rin nagkakasama dahil sa pagde-deliver ng ibinebentang kandila sa mga katabing lalawigan.
Ang biktima ay napag-alamang anak ng may-ari mismo ng kompanya ng pagawaan ng kandila sa kanilang lugar.
PAHINANTE NATODAS KAHIHINTAY SA DRIVER
PINAGBANTAY lamang ng kanilang delivery truck ang isang helper ngunit patay na nang datnan ng kanyang driver kamakalawa ng hapon sa Malabon City.
Kinilala ang biktimang si Alvin Tolentino, 33, residente ng 441 PNR Compound, Brgy. 73, Caloocan City, naninigas na ang katawan nang matagpuan sa loob ng binabantayang delivery truck.
Batay sa ulat ni PO1 Jimmy Delgado, dakong 2:50 p.m. nang makita ang bangkay ng biktima sa loob ng nakaparadang truck sa kanto ng Honradez St., Brgy. Tugatog ng nasabing lungsod.
Salaysay ng driver na si Andy Lopez, iniwan niya ang kanyang helper bago mag-12 p.m. upang umuwi sa kanilang bahay sa M.H. Del Pilar St., Brgy. Tugatog at binilinan na bantayan muna ang kanilang truck.
Nagulat na lamang si Lopez nang puntahan siya ni Enrico Yuzon, 42, na kapitbahay at sinabing nakitang wala nang buhay si Tolentino.
Patuloy na inaalam ng mga awtoridad kung sadyang namatay ang biktima o may naganap na foul play.
(ROMMEL SALES)
