HATAW! D'yaryo ng Bayan hatawtabloid.com
KALIBO, Aklan – Aabot sa 15 mag-aaral mula sa high school at dalawang guro ang nalason sa kinaing cake na gawa sa isang uri ng kamoteng kahoy na niluto bilang bahagi ng kanilang experiment para sa kanilang Science Fair sa Batan, Aklan.
Base sa report, ang mga biktima ay nakaramdam ng pagkahilo, pananakit ng tiyan at pagsusuka makaraan kumain ng cake na gawa sa indigenous root crops.
Agad isinugod ng ilang guro sa pinakamalapit na klinika ang mga biktima nang magreklamo na sumama ang kanilang pakiramdam ilang minuto makaraan kumain ng cake.
Sinabi ng principal na tumangging magpasambit ng pangalan, binigyan ng assignment ang mga estudyante sa third year high school na magluto ng cake na ang harina ay mula sa indigenous source.
Napiling sangkap na tinatawag ng mga Aklanon na rima-rima at kayos na parang gabi ang itsura ngunit nakalalason kung hindi tama ang paghugas at pagluto nito.
Sinabi pa ng principal, hindi sinunod ng mga mag-aaral ang instruction dahil hindi nila ipinaalam sa kanilang adviser ang mga sangkap na gagamitin at sa bahay ng isa sa kanilang kaklase ito niluto.
Mabango aniya ang amoy ng nilutong cake kaya nahikayat ang mga biktima kasama ang dalawang guro na tikman agad ang cake.
Sinagot ng naturang paaralan ang gastos ng mga biktima sa pinagdalhang klinika.
(BETH JULIAN)
