HATAW! D'yaryo ng Bayan hatawtabloid.com
TATLONG tanker ang nagliyab at nasunog sa isang oil depot sa Old Panaderos St., Punta, Sta. Ana, Maynila kahapon ng umaga.
Ayon kay Manila Fire Marshall Supt. Jaime Ramirez, nagsasalin ng gasolina ang tanker (CUV 851) sa isa pang tanker (WGU 626) nang maganap ang insidente.
Sa kalagitnaan ng pagsasalin, nag-start ng makina ang driver ng sinasalinang tanker dahilan upang magliyab ang baterya na naging mitsa para magsimula ang apoy.
Nadilaan din ng apoy at nasunog ang isa pang tanker (WMZ 107) na may 10 metro ang layo.
Ayon sa may-ari ng compound ng Petroleum Techonology and Research Corporation na si Enrique Tan, ito ang unang pagkakataong may hauler na nagsalin ng gasolina sa kanyang mga tanker sa loob ng compound.
Iginiit ni Tan na hindi magliliyab ang mas malaking storage tank na malapit sa tatlong nasunog na tanker dahil diesel ang laman nito.
Mabilis na naapula ang apoy dahil sa ginamit na special chemical ng BFP. Tinatayang aabot sa P1 milyon ang halaga ng natupok na mga tanker bukod pa sa halaga ng nasunog na libo-libong litro ng gasolina.
Sa kaparehong compound nagkaroon ng gas leak na nagresulta sa paglilikas ng mga residente dalawang taon na ang nakalilipas.
ni LEONARD BASILIO
