Ex-PBB housemate binugbog ng GF

BACOLOD CITY – Dumulog sa Bacolod Police Station-3 ang dating PBB Season 2 housemate at ngayon local TV host sa lungsod ng Bacolod na si Nel Rapiz makaraan bugbugin ng kanyang girlfriend.

Ang tubong Iloilo na si Ronel Arreza Rapiz, sa totoo niyang pangalan, ay nagpa-blotter ng kanyang reklamo laban sa girlfriend na si Paulette Jean Amador makaraan siyang ipahiya at maltratuhin.

Base sa reklamo ng TV host, naganap ang pag-aaway nila ni Amador sa harap ng nirerentahang bahay ng babae. Pwersahan aniya siyang pinasakay ng tricycle upang dalhin sa presinto ngunit nagmatigas si Rapiz.

Sinabi pa ng dating ‘housemate’, sinuntok siya ng GF na nagresulta sa pagkakaroon niya ng pasa sa kaliwang braso at pagkatanggal ng botones ng kanyang polo shirt at pagkabasag ng kanyang relo.

Binantaan din aniya siya ni Amador na sisirain ang kanyang career sa pamamagitan ng pag-eskandalo sa kanyang show.

Napag-alaman, makaraan ma-evict sa show ay nagtrabaho bilang local game show host sa Bacolod si Rapiz.